Rebeka Ubera Aralarko batzarkideak eta Joxe Etxeberria Arrasateko zinegotziak egindako agerraldian azaldu dutenez, Aldundiaren datorren urteko aurrekontuei aurkeztutako 236 zuzenketek abiapuntu bera dute, hau da, aurrekontuetan eragitea sozialagoak, aurrerakoiagoak eta euskaltzaleagoak izan daitezen.
Adierazi dutenez, iazko aurrekontuetan garraio publikoari eman bazioten garrantzia, aurten, eta egoera ekonomikoa medio, gizarte politikak indartu gura dituzte.
Hala, eskatu dute Udalek ez ordaintzea Diputazioarekin dituzten zorrak eta pertsona nagusien zaintzara bideratutako dirua 8,3 milioi eurotara igotzea ere eskatu dute, zaharren egoitzak sortu eta hobetu, etxez etxeko laguntzak gehitu eta eguneko zentroak indartzeko. Zentzu horretan, Debagoienerako badute proposamenik; gaur egun hutsik dagoen Arrasateko La Merced ikastetxea zahharen egoitza bihurtzea adibidez.
Garraio publikoa
Garraio publikoaren ingurukoa da Debagoienerako espresuki egiten duten beste proposamen bat. Zentzu horretan, ibarreko herrien arteko komunikazioa hobetzea eskatzen dute, baita Debagoiena eta Bizkaia lotuko dituzten zerbitzuak aztertzea ere.
Aralarren zuzenketek, beste hainbat gai ere jorratzen dituzte, hala nola, bidegorrien eraikuntza bultzatzea (besteak beste Landa-Mekolaldeko bidegorrirako eta Antzuola-Bergara tarterako diru lerroak handituz), mugikortasuna hobetzea, hondakinei dagokienez errauskailua beharrean gasifikazioaren alde egitea eta errenta baxuenak Lanbidearteko Gutxieneko Soldatarekin parekatzea. Etxebizitzen arazoari irtenbidea emateko egiten duten proposamena da Aldundiak lurrak erosi eta lurren banku bat sortu ta kudeatzea, Udalek alokairu sozialeko etxeak egin ahal ditzaten.