Europako Hauteskundeak

Iniziatiba garaile, PSOE ere gora eta besteak behera

Eneko Azkarate Laspiur 2009ko eka. 5a, 15:42
Europak oraindik ez du debagoiendarren interesa behar adina pizten, eta atzoko hauteskundeetan abstentzioak ia lau puntu egin zuen gora: 51.451 laguneko erroldatik, 30.611k ez zuten botorik eman (%60,07; 2004an, %56,27). Emaitzei dagokienez, Iniziatiba Internazionalista alderdiak irabazi du Debagoienean, bigarrenarekiko (Europaren Aldeko Koalizioa, EAJrena) gutxigatik bada ere: 6.132 boto lortu ditu, emandako boto guztien %29,42, eta aurreko hauteskundeetan Herritarren Zerrendak lortutako emaitzak modu nabarmenean hobetu ditu: hark 5.399 boto lortu zituen, boto baliozkoen %23,09.

Hala ere, emaitza globalek ez diote balio izan Iniziatiba Internazionalistari Europan ordezkaririk izateko.

Baina Debagoieneko hiru herri nagusienak kontuan hartuta, beste alderdi batzuek irabazi dute. Hala, Iniziatiba Internazionalista izan da alderdi bozkatuena Aretxabaletan, Eskoriatzan, Antzuolan, Aramaion eta Leintz Gatzagan; Europaren Aldeko Koalizioa nagusitu da Bergaran, Oñatin eta Elgetan; eta PSOEk irabazi du, berriz, Arrasaten.
Bigarren, alde txikiarekin, EAJren Europaren Aldeko Koalizioa izan da, baina behera egin du 2004tik: 6.025 boto lortu ditu, eman diren baliozko botoen %28,91 (2004an, 7.312 boto eta %31,27 puntu lortu zituen).

PSOE, Arrasaten garaile

Hauteskundeek utzi duten beste datu deigarri bat da PSOEk Debagoienean izan duen igoera indartsua. Hala, Arrasaten irabazi egin du –Iniziatiba Internazionalistarekiko alde txikiarekin–, hango botoen %27,02 lortuz. Debagoienean ia lau puntu igo da: 4.071 bozka lortu ditu, boto guztien %19,53 (2004an, 3.779 eta %16,36, hurrenez hurren). PSOE da bailaran igo den alderdi bakarra, Iniziatiba Internazionalistaz gain (Herritarren Zerrendarekin egin da konparaketa).

Gehienak, behera

EAJ jaitsi egin da, baina hala izan da alderdi gehienen kasuan: EAJk, PPk, Ezker Batua-Berdeek eta Aralarrek eta EAk osatutako Herrien Europa-Berdeak taldeak jaitsi egin dira. Jaitsiera nabarmenena Ezker Batuarena da: bi puntu jaitsi da Debagoienean, 500 boto, eta gutxiengoko alderdi bihurtzeko arriskuan dago bailaran.

Horrez gain, alderdi berri bat ere egon da Debagoienean: Ezker Batuko talde bananduak, Alternatibak, babesten zuen Izquierda Anticapitalista-Revolta Global koalizioa. Bada, azkenean, ez dituzte aparteko emaitzarik izan ibarrean: denetara, 89 bozka jaso dituzte Debagoienean, denetatik %0,42. Hori bai, herri guztietan izan du botorik koalizio horrek, Leintz Gatzagan izan ezik.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak