Leintz-Gatzaga, Eskoriatza, Aretxabaleta, Arrasate eta Oñatiko urak jasoko dira araztegian, eta behin ur hori araztuta, Deba ibaira isuriko dute.
Iparraldeko Konfederazio Hidrografikoa da lanen arduraduna; euren esanetan, araztegia martxan jarri eta hilabete gutxira igarriko dugu Deba ibaiaren egoera hobetu dela, alde fisikoari eta kimikoari dagokionez. Hobekuntza biologikoak nabaritzeko, ordea, urte batzuk pasatu beharko dira.
Instalazioek bi zati
Bi zati izango ditu Epeleko araztegiak. Bata, Kataideko industria gunearen ondoan eraikiko dute. Beste zatia, berriz, Etxezarreta ondoan eraikiko dute, autobidean sartzeko errepidearen beste aldean, Bergara aldera, hain zuzen ere.
Lehenengo zatian, Kataide ondokoan, kolektoreetatik datozen ur zikinak iragazi eta urak dakartzan hondakin materialak bahetuko dira. Pabilioi itxia izango da eta pabilioi barruan egingo da azaldutako prozesu guztia; horrela, ur zikinek sortzen dituzten usain txarrak kanpora zabaltzea saihestuko da.
Erreaktore biologikoa
Bigarren instalazioa, Etxezarreta ondokoa, irekia izango da, estali gabea. Hemen, lehenengo instalazioko prozesua amaitu eta gero geratzen diren hondakin kutsakorrak guztiz desegingo dituzte, tratamendu biologiko baten bitartez.
Zubillagako kolektorea
Epeleko araztegiaren proiektuaren barruan, gaur egun Oñatitik Zubillagaraino iristen den kolektorea araztegiraino ekarriko dute. Horretarako, mendia zeharkatzen duen tunela eraiki beharko dute. 1.375 metroko luzera izango du horrek tunelak.
Lan konplexua
Felipe Roman ingeniariak azaldu digun moduan, lan konplexua da: "Alde batetik, Zubillagatik Epeleraino kolektorea ekartzeak asko zailtzen du proiektua, tunela egitea lan konplexua izango delako. Bestetik, kontuan hartu behar dugu eremu murritzean egin behar dugula araztegia, errepidearen eta errekaren artean geratzen den lur zatian". Horrela, lanek 48 bat hilabete iraungo dute. Azkeneko sei hilabetetan araztegia martxan jartzeko probak egiten jardungo dute arduradunek.
Errepidearen desbideraketa
Epeleko araztegia egin ahal izateko, GI-627 errepidea desbideratuko dute. Arrasaterako norabidean, Epeleko biribilgunera iritsi aurretik dagoen bihurgunetik biribilgunera bertara, 350 metroko errepide zatia. Romanek azaldu digunez, berehala hasiko dira lanekin; izan ere, araztegiaren lanek aurrera egin ahal izateko beharrezkoa da errepidea desbideratzea. Bestalde, lanek irauten duten bitartean bide-gorria moztu eta oinezkoak errekaren beste aldetik bideratzeko aukera ere aztertzen dabiltza.