Izendapenaren barruan sartzeko, baina, mahastiak legeztatuta izan behar dituzte ekoizleek. Mahastiak legeztatuta izateak esan nahi du landatzeko eskubidea izatea. Horretarako, behartuta daude eskubideok erostera. Europak zeharo araututa dauka gai hori; hektarea kopuru jakin batendako landatze eskubideak banatzen ditu herrialde guztien artean. Gero, gure kasuan Espainiak Gipuzkoako Foru Aldundiari ematen dizkio eskubide horiek, honek ekoizleen artean bana ditzan. Gipuzkoaren kasuan, dagozkion eskubide guztiak banatuta daudenez, Espainiako hainbat erkidegori erosi behar dizkiote eskubideok. Murtzia, Andaluzia eta Gaztela-Leoni, hain zuzen ere. Guztira, 100 hektarea landatzeko eskubideak erosiko dituzte mahastiak legeztatu beharrean dituzten ekoizleek. Erosketa horiek egiteko tramitazioak egiten dabil Getariako txakolin izendapenaren kontseilua, baina, ekoizleek jarri beharko dute dirua.
Eskubide erosketa horiei esker, Debagoieneko hiru txakolin ekoizleek, Kataidek, Otxiak eta Juanito Zelaiak, hamar hektarea mahasti legeztatu ahal izango dituzte, eta era horretan, Getariako txakolina izendapenaren barruan sartu ahal izango dira.
Felix Etxagibel Otxia txakolindegiko nagusia pozik dago, baina, Diputazioarendako kritikak ere baditu; izan ere, 1998an Europak eskatu zien herrialde guztiei mahasti guztiak deklaratu zitzatela, denak legeztatzeko. “Gipuzkoako Diputazioak, baina, ez zuen ezer egin; garai hartan mahastiak genituenoi ez zizkiguten legeztatu, tren hura galdu genuen eta orain daukagun aukera bakarra da EAEtik kanpo eskubideak erostea. Ez dut uste justua denik gertatu dena, mahastiak legez kanpo eduki behar izan ditugulako; eta gainera, orain, ekoizleok jarri behar dugulako eskubideak erosteko dirua”, adierazi du Etxagibelek.
Otxiako nagusiak azaldu duenez, udazkenerako erosketak eginda izango dituzte eta gero geratuko dena da Getariako txakolinaren izendapena Gipuzkoa osora zabaltzeko prozesuarekin amaitzea. Prozesu horren arduraduna da Gipuzkoako Diputazioa.