Etxeko ospitalizazio zerbitzua, gaixoaren etxean bertan ematen den asistentzia da. Horretarako, ospitalean erabiltzen diren giza baliabide eta baliabide materialak erabiliko dituzte. Julio sandoval doktorea buru duela, 3 sendagilek, 5 erizainek eta administrari laguntzaile batek osatuko dute lan taldea.
Gurutzetako ospitalea aitzindari
Etxeko ospitalizazio zerbitzua duela 25 urte ipini zuten martxan Bilboko Gurutzetako ospitalean. Ordutik, zerbitzuak eskaintzen dituen kalitatea eta bideragarritasuna medio, hainbat izan dira zerbitzua martxan ipintzearen aldeko apustua egin duten ospitaleak. Datorren ekainaren 2tik aurrera, Debagoieneko ospitaleak ere eskainiko du etxeko ospitalizazioa eta Debagoieneko zortzi herrietan eta Aramaion eskainiko du zerbitzua.
Abantailak
Etxeko ospitalizazio zerbitzuak duen helburu nagusia, gaixoari ahalik eta traturik egokiena ematea da. Hain zuzen ere, zerbitzu horrek, ospitaleratzean hainbat abantaila eskaintzen ditu:
- ospitalizazioak eragin ditzakeen kalte psikologikoak ekiditen ditu eta baita ospitalean hartu daitezkeen infekzioak ere.
- Gaixoa ez da nahasten leku aldaketaren eraginez, gaixoa etxean atendituko delako.
- Profesionalen, gaixoen eta zaintzaileen arteko harremana estuagoa eta beroagoa da.
Zerbitzuaz baliatu ahalko diren gaixoak dira ospitalean ingresatu behar direnak baina arreta edo zainketa intentsiborik behar ez dutenak.
Eguneko 24 ordutan
Zerbitzua eguneko 24 ordutan eskainiko da. Goizez eta arratsaldez gaixoen etxeetara joango dira zerbitzua osatzen duten lan taldeko profesionalak eta gauez, SOS Deiakeko profesionalek izango dute gaixoak beharra izanez gero, hura artatzeko ardura. Horregatik, gauez joaten den sendagileak, gaixoaren historial klinikoa izan dezan, etxean beti utziko dute haren eboluzioa eta historiala erakusten duten informazio orriak.
Ospitaleko lanak
Bestetik, Debagoieneko ospitaleko lanei dagokienez, ospitaleko zuzendari Jose Luis Angulok adierazi du, lanak martxa onean doazela eta 2010erako proiektua amaitua egongo dela aurreikusten dutela. Horrekin batera adierazi du, eraikina berritzeaz gainera, zerbitzu berriak ere eskainiko dituztela. Hasteko, urologia zerbitzua ezarriko dute oraingo urtean eta urrian, UVI mobila ere izango du ospitaleak.