Arratsaldeko 15:00etan abiatu zen ikastaroa. Julen Arexolaleibak egin zituen aurkezpenak 30 bat ikasleren artean. Helburuak azaldu zituen, eduki arloak eta lan prozedurak. Ondoren, han zeuden guztiek beren burua aurkeztu zuten. Gehienek kezka pertsonalak bultzatuta eman dute izena ikastaroan, nahiz eta badiren beste batzuek gauza bera egin dutenak beren lanaren mesede bila.
Lehen hizlariak
Behin sarrerakoak eginda, hasi egin zen ikastaroa bera. Maialen Lujanbio bertsolariak hartu zuen hitza lehendabizi. Maialen ikasle izan zen ikastaro honen lehen edizioan, eta ikastaroaren ikuspegi orokorra eman zuen, panorama orokorra, berak orduan hartutako oharretan oinarrituta.
Ondoren, Xabier Amurizaren txanda izan zen, eta horrek bere ibilbidea azaldu zuen, euskaltzaletu zenetiko bidea. Behin baino gehiago aipatu zituen Marcel Proust eta James Joyce idazleak, batez ere lehena, bera antzeko proiektu batean murgilduta baitabil. "Joan ziren" proiektuak zazpi liburuki edo gehiago hartuko ditu, "Denbora galduaren bila" hark bezala. Jendeak sekulako arretaz jarraitu zituen Amurizaren hitzak, bere haurtzarotik hasita, anekdota ugari kontatu baitzituen, sekulako maisutasunez.
Aditu tituluaren bilakaera
Aditu titulua 2007-2008 ikasturtean egin zen lehen aldiz, orduan 60 ikaslerekin. Graduondokoaren arduradunek diotenez, esperientziak erakutsi diete sakondu egin behar dutela didaktika ereduan; hau da, ikasleei aukera handiagoa eman behar dietela parte hartzeko, ikasitakoan sakontzeko, nork bere interesen arabera ondorioak ateratzeko. Hala, arreta berezia eskainiko diete:
- Hezkuntza sistemari.
- Tokian tokiko ekimen eredugarriei.
Helburuak
Ikastaroak helburua du corpus batean biltzea euskal kulturgintzari buruzko jakintza, barreiatua dago-eta, eta belaunaldi gazteei transmititzea. Halaber, ikusita zelako desafioak dituen euskal kulturgintzak, bilatzen du formazio multifokala eta praktikoa
egitea. Hori guztia arituek eta adituek emanda. Beste alorretakoen eskura jarriko du, orobat, kulturgintzaren transmisioan izandako estrategia eta esperientzia partzialak. Horretarako, bi multzo harreman eragingo ditu: aritu eta adituen multzoa eta bihar-etziko eragileen multzoa, gai honetan jantzi nahi duena.