2023ko hauteskundeetarako EAJko zerrendaburu aurkeztu zen Mikel Lete, eta agintaldi honetan EAJko zinegotzia eta bozeramailea izan da joan den astelehenera arte. Alderdiarekin eta udal taldearekin haurnartu eta partekatu ostean erabaki dute bere udal ibilbidea amaitutzat emateko unea iritsi dela, eta "EAJren proiektua Udalean aurrera eramango duten pertsona berriei bide ematea".
Ia hiru urteko ibilbidea "bizia bezain aberasgarria" izan dela adierazi zuen, eta esker hitzak baino ez zituen hitzak. Batetik, bere alderdiari eta herritarrei "bere garaian aukera eta babesa emateagatik Bergara eta bergararren alde Udaletik lana egiteko". Bestetik, udal langileei zuzendu zitzaien urte hauetan jasotako laguntza eskertzeko.
Udalbatza osatzen duten kide guztiak ere izan zituen gogoan, "nahiz eta gure artean ikuspuntu ezberdintak eta eztabaidak izan ditugun, gaur ere eztabaidak izan ditugu, normaltasun batean kokatzen dut iritzi ezberdinak ditugulako, baina balioan jarri nahi dut gure arteko harremana elkarrekiko errespetuan oinarritutakoa izan delako".
Udal taldeari ere eskerrak eman zizkien urte hauetan izandako inplikazioagatik, konpromisoagatik eta egindako lanagatik: "Jarraitu horrela lanean".
Aurreratu zuen, aurrerantzean ere, osoko bilkuretara joaten jarraitzeko asmoa duela, "lehen ere etortzen nintzen zinegotzi izan aurretik", baina herritar bezala.
