Aspace Gipuzkoako ikasleek ikasturteko zerbitzuaz gain, beste 33 arreta-egun gehiago izango dituzte, eta programak jantoki eta garraio zerbitzua ere eduki ahal izango ditu. Zerbitzua 09:00etatik 17:00etara bitartean izango da Bergarako, Donostiako, Beasaingo, Irungo eta Eibarko Aspace Gipuzkoa zentroetan.
Zainketa eta Gizarte Politiketako diputatu Maite Peñak nabarmendu duenez, "zainketen kontzepzio berri bati erantzuten dio ekimen honek: pertsonak ardatz dituena, eta aitortzen duena ezen gaitasunak garatzeko –motorrak, kognitiboak, komunikatiboak, sozialak eta emozionalak– etengabeko laguntza behar dela, errealitate bakoitzera egokitutako ingurune seguruetan".
Aldunditik adierazi dutenez, programaren helburua da ikasleek dituzten trebetasunak mantendu eta indartzea, "atzera egin ez dadin eta parte-hartzaileei aurrera egiten laguntzeko". Era berean, nabarmendu dute egunerokoan egonkortasun eta laguntza handiagoa izateko esparru bat eskaintzen zaiela familiei.
Gipuzkoa Aspaceko familien aldarrikapenak
2025-2026 ikasturtea hasi berritan, Gipuzkoa Aspaceko ikasleen gurasoek salatu zuten aurtengo ikasturtearen eskola-egutegiak 33 egun gutxiago zituela. Horrek Debagoieneko Aspaceren zentroetako 3 eta 20 urte bitarteko hamar ikasleri eragiten zieten: zazpi Bergarako zentrokoak eta hiru Eskoriatzakoak.