San Martin Agirre herri eskolako txikitxoenak izan dira Korrika Txikiaren lekukoa eramaten lehenak. Matxiategi kaletik barrena azoka ondotik pasa ostean, Txantxiku Ikastolakoei pasa diete lekukoa Ibargarai kalean eta San Antonioko biribilgunera arte eraman dute horiek, han Mariaren Lagundiko ikasleei pasatzeko. Mintegi kalean gora egin eta San Pedro kaletik pasa ostean, Ariznoa plazan elkartu dira denak amaiera ekitaldirako.
Ekitaldi horretan herriko alkate Gorka Artolak hartu du hitza denei eskerrak emateko. Eta Korrika handian zein Erramu Zapatuko festan parte hartzera animatu ditu. Segidan, mezua irakurri dute ikasleek eta koplak ere abestu dituzte.
Ikasleek ez ezik, irakasleek eta gurasoek ere hartu dute parte Korrika Txikian.