Domeka eguerdian, Viva el Circo saioaren emankizunean, zenbait herritar ziren, belaunaldi bat markatu zuen pailazoa ikusteko gogoz. Saio nostalgikoa izan dela ere adierazi dute askok zirku karpatik ateratzean. Euren seme-alabek kantuak ez zekizkiten arren, ikuskizunarekin gozatu dutela azaldu dute hainbat ikuslek. Emanaldiaren ostean, Alfonso Aragon Fofito pailazoa pozik agertu da Bergarako ikus-entzuleek emandako babesarekin.
Bergarako ikus-entzuleen "harrera ona"
"Ikuskizunak oso ondo joan dira asteburuan, eta, beraz, datorren asteburuan ere hemen izango gara. Hasi ginenetik asko aldatu da zirkua: argiak, bidaiatzeko modua…, baina, Aragon familiaren ¿Como estan ustedes? esaldiak tinko jarraitzen du eta betiko kantuak dira eskatzen dizkidatenak. Saiatu naiz berriak egiten, baina, publikoak Hola Don Pepito; Susanita… kantuak nahi ditu. Bergarako emanaldietara bueltatuz, lehenengo aldia da hona gatozena, eta, pozik gaude herritarren erantzunarekin eta euren txaloekin” adierazi du Alfonso Aragon Fofito-k.
