Gaur arratsaldeko hiruretan Bergarako mezkitan emango diote azken agurra, martitzenean Labegaraietan autoak harrapatuta hil zen 38 urteko gizonezko senegaldarrari. Gorpua aberriratzea da familiaren asmoa, eta hari laguntzeko asmoz senegaldar komunitateak eta euskaldunek osatutako Bergarako Ndank Ndank elkarteak diru-bilketa jarri zuen martxan atzo, eta dagoeneko, 6.000 euro pasatxo jaso dituztela adierazi dute elkartetik: "Oso hunkigarria da jendearen elkartasuna. Oraindik ez dakigu gastuak zenbaterainokoak izango diren. Aberriratzeak irauten duenaren arabera, gora edo behera egingo du, baina uste dugu aurre egingo diogula". Aurreratu dute aberriratzearen kostuak baino diru gehiago batzen badute, diru kopuru hori hildakoaren Senegalgo familiari bideratuko dietela.
Rural Kutxako ES86 3008 0169 5224 5922 8025 kontu korrontean egin daiteke dohaintza Ousmane jarrita kontzeptuan. Bi telefono zenbaki ere jarri dituzte harremanetarako: 636 16 30 10 eta 656 18 34 42.
Elkarretaratzea gaur
LAB sindikatuak harrapaketa lanera joan bitartean gertatutako istripua, in itinere, izan zela salatu zuen, eta gaur arratsalderako elkarretaratzea deitu du, 17:30ean Labegaraietako kiroldegi aurrean. Biktimak AGT Arrasateko garbiketa enpresan egiten zuen lan, eta lanera joateko autobus geltokira zihoala gertatu zen ezbeharra, LABek jakinarazi duenez.
