2022an antolatu zuten lehen aldiz Gipuzkoako Erroten Eguna, erroten "garrantzi historikoari, teknologikoari, antropologikoari eta etnografikoari" balioa emateko. Ekimen hori Udalaren, Yurrita elkartearen eta erroten azterketa eta kontserbaziorako ACEM erakundeen arteko lankidetzaren emaitza da. Udaleko zinegotzi Maite Usabiagaren arabera, "garrantzitsua" da erroton historia berreskuratzea.
Erakusketa eta bisita gidatua
Bergaran bi ekintza nagusi antolatu dituzte. Batetik, Bergarako errotak erakusketa irekiko dute Aroztegin zapatuan, hilak 10; irekiera ekitaldia 12:00etan egingo dute, eta hilaren 18ra arte egongo da zabalik. Bestetik, San Juan auzoko Elortza-Bolua baserriko errotara bisita egingo dute hilaren 18an (12:00); bisitarako, izena eman behar da: bergara.eus edo 943 77 91 59. Errota hori aspaldi ez da martxan jarri, bertako bizilagun Amaia Zabaletaren arabera: "Laga zen moduan dugu errota. Halako ondare bat ondo kontserbatu behar dela transmititu ziguten arbasoek. Istorio asko entzun ditugu errotez, besteak beste, gerraosteko goseterako zein garrantzitsuak izan ziren argitzen dutenak".
Bergarak 40 errota izan zituen
Iraganeko garrantzi ekonomikoa galduta, errotek balio handia dute gaur egun ondare ikuspegitik. Debagoienean Bergara izan zen errota gehien izan zituen herria, eta, Bergarako errotak izeneko liburuaren egile Patxi Larrañagaren arabera, 40 errota edo bolu izan ziren Bergaran garai batean: "Askotariko erabilerak zituzten errotek, baina imajinatu zenbat garo eta arto egongo zen Bergaran eta inguruetan 40 errotari jaten emateko...".
