Arrizuriaga jauregian lekua izango duten Kulturgunearen lehen pintzeladak eman ditu azken hilabeteetan Bergarako Udalak herritar talde batekin. "Barne mailan" landu dituzte proposamenak eta orain ateratako ondorioak mahai gainean jarriko dituzte herritarrekin batera "espazio kultural ireki, malgu eta parte-hartzailea eraikitzea, Bergarako komunitatearen behar artistiko eta kulturai berriei erantzunez".
Bergarako kultura zinegotzi Maite Usabiagak adierazi du Arrizuriagak Bergarari emango dizkion balioez eta onurez hausnartu dutela, eta datozen egunetan martxan jarriko duten prozesuan herritarrekin, kultura elkarte eta eragileekin pentsatu duten guztia kontrastatuko dutela falta diren erabakiak guztiek pbatera hartzeko.
Aurrelanketa horretan atera dituzten ondorioez galdetuta, azpimarratu du Arrizuriaga "topagune handi" bezala irudikatzen dutela, "kultura egonezina" duten herritar, elkarte eta eragileak elkartzeko, kulturari buruz eta aurrera eraman nahi dituzten kultura-politikak eztabaidatu eta erabakitzeko. Irudikatzen dute "erabilera anitzak" jasoko dituen eraikina izango dela: "Ikusten dugu elkarteen eguneroko jarduna aberastu ahal duen baliabide bat bezala. Hitzaldiak, jardunaldiak, artistak gonbidatzeko gune bat, entsegu lokalak. Baina beste alde batetik, pentsatzen dugu badaudela herritarrak proiektuka lan egiten dutenak eta pentsatzen dugu horiei ere bide bat zabaldu behar diegula haien lanak babesteko".
Lau saioko prozesua
Arte garaikidean eta komunitate prozesuetan eskarmentua duen Artaziak kooperatibak gidatuko ditu prozesu herritarreko saioak. Hango kide Andrea Arrizabalagak aurreratu du prozesua hasi baino lehen, apirilaren 9an, 18:00etan Arrizuriaga bertan herritarrei "ongietorria emateko" saio bat prestatuko dutela, prozesuak kokatu daitezen: "Asmoa da asmoak azaltzea eta bakoitzak ulertzea zein den bere papera, denon prozesua izango baita. Hortik aurrera hasiko ginateke guk plateatutako prozesuarekin".
Datak oraindik zehaztu gabe, bi orduko lau saio antolatuko dituzte –bi uda aurretik eta bi ondoren–. Lehen saioa Nor gara? izenburupean planteatu dute eta Arrizabalagak dioena da Arrizuriaga zerekin lotzen duten pentsatuko dutela: "Uste dut egon dela denbora hausnarketarako eta orain, lurrera jaitsi behar dugu eta hasi behar gara pentsatzen zer-nolako gauzak gertatu ahal diren hemen eta zerekin lotzen ditugun. Musikarekin, literaturarekin...".
Hala bigarren saioan, imajinatzen duten hori nola egin dezaketen ikusiko dute, eta gobernantza-eredua lantu. Behin markoa zehaztuta, hirugarren saioan pentsatuko dituzte ekintza eta lan-ildo zehatzagoak. Azken saioa abenduan egitea aurreikusten dute.
Herritarren parte-hartzea
Artaziak kooperatibako kideak azaldu du kulturarekin edozein lotura duten pertsonei zuzendutako saioak izango direla. "Deialdia guztiz irekita dago eta edonork hartu dezake parte, kulturarekin nolabaiteko lotura profesional bat duenak edo hartzaile bezala ere bai".
Usabiagak nabarmendu du Bergarak baduela historian zehar jatorri kultural-artistiko garrantzitsua eta "hori guztia babestu eta aurrera jarraitzeko beste pauso garrantzitsu bat" bezala definitu Arrizuriagako Kulturgunea. "Gu ilusio handiz ari gara lanketa egiten, eta iritsi da momentua herrira zabaldu eta konpartitzeko. Eta espero beraiek ere horrela hartu ahal izatea".
Lanen bigarren fasea hastear
Aurreikuspena da 2026ko lehen hiruhilekorako Kulturgunea martxan izatea, eta hiru solairu izango ditu: Arrizuriagako beheko eta lehenengo solairua, eta sotoa. Dagoeneko beheko solairuan eta sotoan berritzeko lanak hasita daude, eta datozen hilabeteetan esleituko dituzte goiko solairuetako obrak.
Usabiagak egiturari buruz gaineratu du beheko solairuak bi espazio "handi eta garbi" dituela. Sotoaren zati bat zuzenduko da Kulturgunerako, bestea, biltegia izango delako: "Sotoko gelak, nolabait, erdi lurperatuta geratzen dira eta iluntasuna eta isiltasuna bermatu ditzaketen espazioak dira. Momentuz espazio zabala da, ahalik eta zabalena, printzipioz, erabilera anitz izateko".
