Bergarako Musika Bandak domekan emango du urriko kontzertua, eta, frontoiko lanak medio, emanaldia plazan izango da, 12:30ean. Eguraldi txarra bada, San Pedro elizara lekualdatuko dute.
Sei abestiz osatutako errepertorioa prestatu du bandak. J. Texidorren De Andalucía a Aragón pasodoblearekin hasiko dute emanaldia, eta ondoren joko dituzte F. von Supperen Zalditeria arina, R. Chapiren El tambor de Granaderos, M. Sweeneyren Song for Hope, J.P. Haecken Kansas eta Coldplay taldearen hiru doinu arrakastatsu jasotzen dituen M. Brown-en moldaketa.
Txurrukaren itzulera
Kontzertuko "berritasuna" Enrike Txurruka zuzendariaren "itzulera" izango da. Ekainean min hartu zuen eta azken hilabeteetan Igor Larrañagak zuzendu du banda: "Lanean jarraitu dut, normal. Partiturak prestatzen eta abar. Iraileko kontzertuan zuzentzen ez, baina jotzen egon nintzen; beraz, ez dut ia deskonektatu".
