Hamelingo txirularia euskarazko musikala estreinatuko dute azaroaren 9an eta 10ean Bergarako Seminarixoan, lau saiotan banatuta, egun bakoitzean bina: 17:00etan eta 19:00etan. Urriaren 11n jarriko dituzte salgai estreinaldirako sarrerak Seminarixoko webgunean eta eguaztenetan, berriz, leihatilan, 18:00etatik 20:00etara.
Bergara Antzerki Musikala elkartea dago musikal honen atzean, eta Valen Moñux bergararrak egin du euskarazko egokitzapena –Miren Amasorrainek, Oihan Vegak eta Jone Larrañagak zuzenketak–; hain justu, Ander Arrutirekin batera, bera da zuzendari eszenikoa ere, eta laguntzaile lanetan arituko da Oihan Vega. Marije Ugaldek izango du abeslariak eta abesbatzak zuzentzeko ardura.
Parte-hartzaileei dagokienez, hamar musikariz osatutako zuzeneko orkestra izango da musikalaren osagaietako bat; horrez gain, 30 aktore eta abeslarik hartuko dute parte, eta 40 haurrez osatutako abesbatza bat ere izango da.
Hamahirugarren musikala
Elkartekideen hitzetan, "Bergarako herriak 35 urte daramatza formatu handiko musikalak" egiten, eta hamahirugarrena da hau. Miserableak izan zen taularatu zuten mota horretako lehen ikuskizuna 1991n, eta 2010ean, berriz, "historiako lehen euskal musika originala" aurkeztu zuten: Olentzero & Co!.
2015ean elkartea sortu zuten, eta, horrekin batera, Mozkorra parregarri lana: "Historiako euskal lehen opera berreskuratu genuen bere 250. urteurrenean. 2023an, berriz, geure iraganeko pasarterik bortitzenetako bat kontatu genuen, Euskal Herriko idazlerik ospetsuenaren eleberria taularatuz: Bretxa, 1813ko sutea musikala".
Euskarazko musikala, familia guztiarentzako
