Tenperatura altuen eraginez alerta laranjan sartu da Gipuzkoako barnealdea, eta horrenbestez Debagoiena. Gauzak horrela, Beroaldien Aurkako Plana aurkeztu berritan, hau aktibatzeko beharra izan du Bergarako Udalak. Honen eraginez, beroaldietarako babesa emango duten lekuak herritarren eskura eta doan jarriko dira. Babesgune hauek hiru motatakoak dira: Babesgune itxiak, kanpoko babesguneak eta freskatzeko lekuak.
Prebentzio neurriak hartzea ere gomendatu du Bergarako Udalak: Deshidratazioa saihestea, berotik babestea eta pertsona ahulenak zaintzea. "Adinekoek, batez ere bakarrik bizi direnek edo mendekotasuna dutenek, zailtasunak izan ditzakete babes-neurriak hartzeko; beraz, komeni da egunean behin bisitatzea, gutxienez", gaineratu du Udalak ohar baten bidez.
Plana eguaztenerako desaktibatuko da, aurreikuspenen arabera, tenperaturak egun horretan jaitsiko direlako.