Zaila da lau eguneko tartean hainbeste kontzertu ezberdin batzea herri bakarrean. Bergarako jaiak antolatzen ibili diren eragileek beste behin erakutsiko dute herritarrak gozarazteko daukaten ahalmena.
HILAK 17 / 20:00 / SAN MARTIN PLAZA
Doinu urbanoek emango diote hasiera ostiralean Pentekosteen egitarau musikalari, Mugimendu Sozialistaren txosnan. Bien bitartean, Bergarako Musika Bandak kalejira egingo du plazatik hasita.
Sotoalde
Proiektu freskoa da laukote bergarar gazteak esku artean duena. Joan den azaroan eman ziren ezagutzera eta badabiltza bideoklipak aleka argitaratzen.
HILAK 17 / 22:30 / TXOSNAGUNEA
Xaxau konpartsak zerbitzatuko duen lehen platerak rock, folk eta agrodance ukituak dauzka. Kontzertu horiek amaitzean teknoak hartuko du plaza, Ots, Wey, Zumi eta Anomalia bZb Munabek gidatuta.
Golden Blend
Zero kilometroko rockzale horiek plazaz plaza ari dira estudioko lehen lana, Bonben zalduna, aurkezten.
Unidad Alavesa
Lazkaoko talde ezagunak Motoki, Zakurreki, Egurreki... disko berriko kantuak gehitu dizkio ohiko errepertorioari.
Gora Etorri
Hemendik At dantzagarriaren usaina daukan proposamena, ezinezkoa haiei begira barrara itsatsita geratzea.
HILAK 17 / 23:00 / SAN MARTIN PLAZA
Bergarako Udalak ere prestatu du Pentekosteen lehen egunerako emanaldia, sentsibilitate handiko artista ekarrita.
Janus Lester
Beratik dator Jokin Pinatxoren ahots berezia, arima beltza, elektronika eta funka ederto menperatzen duten musikariekin.
HILAK 17 / 24:00 / SAN MARTIN PLAZA
Mugimendu Sozialistaren egitarauak gauerdian izango du jarraipena. Gainera, DJak egongo dira 02:00etatik aurrera egubakoitz, zapatu eta astelehenean.
Kontralde
Arrasateko zigilua duten punk-rockerrek gustua hartu diote oholtzari azkenaldian; Erantzun bila aterako dira oraingoan ere.
Berandu Baino Lehen
Mundu kapitalistaren trapu zikinak azaleratzen ditu hirukote debagoiendarrak Utopian zein? lanean grabatutako abestietan.
Babes Gabe
Egitarauko banda gazteenetakoa, distortsioa maite duten elgetar horiek euskal taldeen bertsioak egiten dituzte, eta hasiak dira abesti propioak lantzen.
HILAK 18 / 16:00 / TXOSNAGUNEA
Presoen aldeko bazkariaren ostean hasiko da zapatuko lehen zuzeneko kontzertua. 19:30ean, Guateke More Ibiltariaren erritmora joango dira festazaleak kalez kale.
The Sakamantekas
Agurainen sortutako talde horrek lastategiko punk-rock patxangeroa egiten du, haien abestiak eta euskal bertsioak tartekatuz.
HILAK 18 / 22:30 / TXOSNAGUNEA
Bideberrin jarraituko dute kontzertuek gauean, askotariko estiloak nahastuta.
Zilibito Records
Kolektiboan egiten du lan oiartzuar koadrila gazte horrek. Deabruen doinuak EPan, musika urbanoaren bueltan, bachata, pop punk, hyperpop eta trap osagaiak daude.
Alargun Beltzak
Pasai Antxoko elektrotxaranga estiloko emakume taldea agertokietan jotzera ohitu da dagoeneko, musika giro maskulinoari aurre egiteko asmoz.
Lemak
Bizitasuna eta patxada konbinatuz, Herrikide diskoan bildutako kantuak eta nobedade gehiago ere aurkeztuko dituzte 2019tik herrian ezagunak egin diren hiru musikariek.
HILAK 18 / 23:00 SAN MARTIN PLAZA
Zapatuan Udalaren apustu sendoarekin hasiko da plazako egitaraua.
Su Ta Gar
Aurkezpenik behar ez duten heavyek aho bete hortz utziko dituzte ikus-entzuleak; soinu eta argi-joko indartsuekin Alarma guztiak apurtuko dituzte.
HILAK 18 / 24:30 / SAN MARTIN PLAZA
Eibartarren ostean, animoz betetako neska talde batek jarriko du publikoa dantzan, Mugimendu Sozialistaren eskutik.
Hamarratz erromeria
Oñatitik dator nerabeak izanda ere lotsak atzean utzita dauzkan lagun taldea, gozatzeko eta gozarazteko asmorik onenekin.
HILAK 19 / 19:00 / TXOSNAGUNEA
Domekako bazkari irekia eta bazkalostea Txomingerok eta Fanfarriak alaitu ostean, motibazioa goian mantentzeko plan ezin hobea dauka Xaxau jai herrikoien konpartsak.
Xabi Solano Maiza
Musika estilo eta hizkera aldaera aberatsak plazaratuko ditu Hernaniko trikitilari trebeak, ibilbide luze eta laburragoko kantuen bidez.
HILAK 19 / 21:30 / SAN MARTIN PLAZA
Jaietako hirugarren egunean trikipop estiloari egingo dio tokia Bergarako Udalak.
Haize Arrosa
Sentimendu feminista sakona eta edertasunaren kanon sozialei egindako kritikaz osatutako lana, Ez dogu zor ezer izenekoa, aurkeztuko du Bizkaiko talde berri horrek.
HILAK 20 / 12:30 eta 23:00 / ESPOLOIA
Edozein herritan ongietorriak diren kantuak bertatik bertara dantzatu ahalko dira astelehenean, birritan.
Joselu Anaiak
Marina, Ai, Txabela! edota Uso zuritxo polita, modaz pasatzen ez diren klasikoak, eskainiko ditu 1977an debutatu zuen Araiako berbenazale familiak.
HILAK 20 / 20:00 eta 23:00 / TXOSNAGUNEA
Azken hatsa Xaxauren kontura emango dute parranda-zaleek, afal aurretik eta afalostean.
Trikidantz
20:00etan nagi guztiak uxatuko ditu Iturengo erromeria talde horrek, kaleratu duten bi diskoetako baten tituluak dioen bezala, publikoari Bizitzaz goxatu behar dela gogoratuta.
Sukena
23:00etatik aurrera pop-rocka uztartzera igoko da seikote oñatiarra, Guztia gordetzea ezinezkoa da estreinako lanean erakutsi moduan. Udazkenean argitaratu zutenetik makina bat kontzertu ari dira.
Raimundo el Canastero
Rumbak elkartu zituen Lizarran talde horretako kideak. Jaiei agur esango diete flamenko, autotune eta rap nahasketez jositako N.T.E.R. diskoko kantuak abestuta.
