Aspaldikoa da Matxiategiko hilerriko kapera berritzeko beharra. Lanak 2023ko azaroaren 15ean hasi ziren, eta, proiektuak bost hilabeteko exekuzio-epea duenez, 2024ko apirilaren 15erako lanek amaituta egon beharko lukete. Harri Construcciones y Manposteria enpresari esleitu zion Udalak proiektua, 136.234 euroko aurrekontuarekin –BEZa barne–, bereziki kaperak zituen bi arazo konpontzeko: batetik, fatxada nagusiko arkuaren mugimendua; eta, bestetik, ondoko eraikinaren estalkiaren kokapena.
Babestua izateak, zaildu
Horretarako, honako lan hauek egiten ari dira kaperan: fatxada nagusia garbitu; zorrotenetan jasotzen diren euri-urak behar bezala bideratu, aurreikusitako kutxeten bidez eta PVCzko hodi berri batez –lurpeko ur-kopurua mantentzea da helburua–; fatxada nagusia eta albokoak zaharberritu; zurezko egitura egonkortu kontserbaziorako irizpideak lehenetsita; eta, azkenik, kanpoko arotzeria berreskuratu.
Udaleko zerbitzu teknikotik adierazi dute eraikin zaharra eta babestua izateak esku-hartzea zaildu egiten duela: "Ondare historikoa zaharberritzeko obrek eraikuntza-arauei eta kultura-ondasuna mantentzeko, errespetatzeko eta kontserbatzeko irizpideei erantzun behar diete. Kasuistika berezi horrek areagotu egiten du jardunaren ziurgabetasuna; hasierako aurreikuspenak alda daitezke, babestutako ondasuna denez ezin direlako beste eraikin mota batzuetan egin daitezkeen desmuntatzeak eta eraispenak egin". Horren adibide da obra hasi eta gutxira langileek segurtasun osoz lan egiteko fatxada nagusiko arkua dagokion lekura eroateko zenbait egokitzapen egin beharra.
Berandu hasi, baina "martxan"
Hilerriko ermita berritzeko lanen hasiera atzeratu egin bada ere, Udaletik azpimarratu dute "martxan" dagoela: "Patologiak aurkitu ondoren, jarraipen zehatza egin behar izan da behin betiko irtenbidea emateko. Horretarako, igeltsuzko lekukoak jarri ziren, eta alboko eraikinaren fatxada eta estalkia finkatu ziren... Eta beharrezko informazioa bildu ondoren, proiektua idatzi zen".
