Martxoaren 16an gertatu ziren istiluak, Realaren eta Erromaren arteko Europa Ligako partidaren aurreko orduetan. Ertzaintzak jakinarazitakoaren arabera, objektuak eta bengalak bota zizkieten jarraitzaile italiarren autobusei eta segurtasuneko ertzainei. Eguazten honetan egin zituzten atxiloketak, Bergaran, Donostian, Lezon eta Durangon.
Atzo epailearen aurrean adierazpenak egin ostean, epaileak aske uztea erabaki zuen, Realak jokatzen duen egunetan zelaira ez hurbiltzeko baldintzarekin. Gainera, debeku horretaz gain, Aita Donostia plazako biribilgunera ezin izango dira hurbildu, han Gastrobar Victoria dagoelako eta zaleak han bertan elkartzen direlako partiduen aurretik. Ertzaintzak ikerketarekin jarraituko du.
