Zuberoako Xiberoots taldeak gaueko hamarretan Munibe plazan emango duen kontzertuarekin amaituko da Erramu-zapatua. Sei hilabeteko atsedenaldiaren ostean, martxoaren 15ean eman zion hasiera denboraldi berriari, Zornotzan, eta aurtengo bigarren kontzertua izango da bihar eskainiko duena. Beat elektro-poparekin eta beste estilo batzuekin nahasten du seikoteak reggae musika. Dena prest daukate biharko, eta, adierazi dutenez, Bergaran egoteko "gogo handia" daukate.
Euren ibilbidean kaleratu dituzten bi diskoetako –Maule Muffin eta Honki Jina– zenbait abesti taularatuko dituzte; baita binilorako moldatu zuten Mikel Laboaren kantu bat ere. Sorpresarik ez, baina aurreratu dutena da zapaturako "emanaldi potoloa" prestatu dutela. 2021ean kaleratu zuten azken lana, eta jakinarazi dute "laster" etorriko dela hurrengoa.
