Hain zuzen, Logroñeseko jokalari Jaime Sierrari egokitu zitzaion, Espainiako Federazioak Las Rozasen dituen instalazioetan, zozketan esku hartzea, eta bertatik bertara ikusi ahal izan zuen zelan egokitzen zitzaion bere taldeari Realaren kontra jokatzea: "Normala den moduan Real Madrid edo Bartzelona ziren gure faboritoak, gurea moduko klub batendako halako kanporaketa bat euren kontra jokatzea gauza handia delako". Baina, pozik zen, Reala egokitu zaielako.
Hala, haren bi taldekide bergararrak dira. Bata Logroñeseko bigarren entrenatzailea, Ibon Labaien (duela gutxira arte Realeko analista izan den, eta Japoniara entrenatzaile lanak egitera joan den Beñat Labaienen anaia), eta bestea, denboraldi hasieran Logroñesera jokatzera joan zen Aitor Arregi atzelaria. Bada, biendako izango da berezia, seguru, urtea hastearekin batera Realaren kontra Las Gaunaseko futbol zelaian (urtarrilak 4, 19:00) jokatuko duten Kopa kanporaketa hau.