Aurreko urteetan bezala, 3-11 eta 12-16 urte arteko seme-alabak dituzten familientzako formakuntza programa prestatu du Bergarako Udaleko Prebentzioa Sailak.
Formakuntza programa honek, azken aldian familia egituran eta dinamikan izandako aldaketek seme-alaben heziketarako funtzioa betetzean sortutako zailtasunei erantzun nahi die. Zailtasun hauek orotarikoak izan daitezke: familia-sistemak berak dituen zailtasunengatik, –bi guraso daudenean eta horietako batek eragiten ez duenean; guraso bakarreko familiak; dibortzio edo banatze prozesu korapilatsua; bizitzako gertakari estresagarriak bizitzea...– gurasoek erabiltzen dituzten heziketa-ereduengatik edo seme-alaben hainbat eratako arazoengatik –arazoak eskolako egokitzapenean edo errendimenduan, portaeran; drogen kontsumo goiztiarrak...–.
Formakuntza programaren helburu nagusia, gurasoei estrategia pertsonalak, emozionalak eta hezkuntzakoak bereganatzen laguntzea da, familiako bizikidetasuna errazteko eta gurasotasun-eredu positiboak garatzeko.
Beste helburu batzuk ere baditu programak, honako hauek besteak beste:
- Aita-amen moduan autoestimua hobetzea, hezkuntza-gaitasunaren sentimendua areagotuz.
- Seme-alaben eta gurasoen emozio eta sentimenduetan eragina duten faktoreak ezagutzea.
- Guraso eta seme-alaben arteko loturak indartzea, komunikazioa hobetzea eta familiako gatazkak murriztea, entzute-gaitasunak, gatazken irtenbide positiboak eta negoziaziorako eta erabakiak hartzeko gaitasunak garatuz.
- Garapen pertsonala modu eraginkorrean estimulatzea.
- Jarrera eta diziplina arazoak prebenitzen ikasi.
- Gurasoentzako erronka suposatzen duten arazoak prebenitzen eta konpontzen ikasi –drogen kontsumoa, eskola porrota...–.
Formakuntza saioen nondik norakoak
Talde batean, 3-11 urte bitarteko seme-alabak dituztenak egongo dira eta beste batean, 12-16 urte bitarteko seme-alabak dituztenak. Taldeak 6-10 pertsonakoak izango dira. Bederatzi saio izango dira guztira; hona hemen egunak: urtarrilak 17 eta 31; otsailak 7 eta 28; martxoak 14 eta 28; apirilak 18; maiatzak 2 eta 16; eta ekainak 6.
Ordutegiari dagokionez, 3-11 urte bitarteko taldea, 15:00etatik 16:30era elkartuko da eta 12-16 urte bitartekoa, 18:00etatik 19:30era. Talde biek Irizar jauregiko Euskaldun berri gelan izango dute elkargunea.
Hainbat eduki landuko dira formakuntza saioetan:
- Familiaren egitura: gurasoen hierarkia, azpisistemen arteko aliantza egokiak –aita-amen artean, seme-alaben artean–.
- Komunikazioa: entzute aktiboa, desberdintasuna onartzeko gaitasuna…
- Gurasotasun positiboa: gurasoak ahaldundu.
- Bizikidetasuna: bikotekideen arteko desberdintasunak egoki kudeatu, seme-alabengan ahalik eta gutxien eragiteko.
- Lotura afektiboa: atxikimendua, lehentasunak, itxaropen zapuztuak, konfiantza galtzea…
- Familia ahalduntzea: hutsegite-sentimenduak edo antzekoak gainditzeko oinarri gisa.