Maiatzean hasi zituzten Arrizuriaga jauregia egonkortzeko lanak, eta, aurreikuspenen arabera, datozen asteetan amaituko dira. Obren amaieraren atarian, eguaztenean egin zuten Arrizuriagaren etorkizuna eraikitzen partaidetza prozesuaren lehen bilera irekia, herritarren eta kultur eragileen proposamenak jasotzeko: alde batetik, espazioen kudeaketa-ereduari buruzkoak, eta, bestetik, kultur eragile gisa garatzeko interesgarriak diren erabilerak.
Era guztietako kultura jardueren egoitza izateaz gain, emakumeentzako gunea ere izango du jauregiak. Udalak adierazi duenez, herriko emakumeekin eta emakume taldeekin batera adostuko dira espazio horren helburuak, zereginak eta dinamikak, besteak beste.
Partaidetza prozesua hasi baino lehen, uztailaren 12an elkartu zen Udal Gobernua kultura eragileekin. Eguazteneko bileran landu ziren ekarpenak eta zalantzak jaso zituzten orduan udal ordezkariek. Gainera, bilera hartan parte hartu zutenek jauregiko obrak ikusi ahal izan zituzten barrutik.
Udal Gobernuak aditzera eman duenez, partaidetza prozesuan zehar emango zaie bilera irekietako informazioa herritarrei.
EAJren proposamena
Coworking-gune bihurtu nahi dute jeltzaleek Arrizuriaga jauregia. Maiatzean etxez etxe banatu zuten eskuorrian zioten proiektu berritzaile baten kokalekua izan behar zuela Arrizuriagak: "Coworking-a lanpostuek, bilera gelek, atsedenlekuek, tailerrek eta kafetegiak osatzen dute, baina, batez ere, coworker-ek; alegia, pertsonek. Arrizuriaga ezin da soilik lanerako espazio bat izan, askoz gehiago izan behar du".
Egin beharreko lanak
Goitu Eraikuntzak SL enpresari esleitu zitzaizkion lanak, 547.964 eurotan –BEZa barne–. Eusko Jaurlaritzaren ondare izendapena daukanez jauregiak, baldintza batzuk bete behar ditu eraberritzeak; adibidez, kanpoko itxura mantentzea. Horregatik, fatxadari dagokionez, finkatze, konpontze eta garbitze lanak egiteaz aparte, egoera txarrean dauden arotzeriak eta hondatutako beirak ordezkatuko dituzte. Barrualdean, egoera txarrean dauden zeramikazko trasdosatuak eraitsi egingo dituzte, eta euskarri ez diren banaketa guztiak nahiz zoladura arinak kendu egingo dira solairu guztietan. Hala, solairu bakoitzean espazio huts bana sortuko dute.
