Bergara izan, bizi, ekin planaren baitan, euskara lan-munduan sustatzeko "aitzindari" diren enpresetatik abiatuta euskararen normalizazioan urrats berriak ematea da egitasmoaren helburua. Esperientzia duten enpresen kasuetatik abiatuta garatu nahi da udaberrian martxan jarri zen prozesua.
Bergarako Udalak prentsa ohar bidez adierazi duenez, "industria-arloko enpresen eta eurekin lotura duten entitateen arteko hitzarmena" egin nahi da. Ekainean eskaini diren lau saiotan aurkeztu zaie hitzarmena enpresei; "20tik gorak" hartu dute parte aurkezpen bilkura horietan.
Gonbidapena
Prozesua, baina, ez da itxia, eta ohar bidez Udalak "hitzarmenean parte hartzeko edo gaiari buruzko informazioa jasotzeko interesa duten enpresei" gonbidapena egin nahi izan die. Udaleko Euskara zerbitzura jo behar dute horretarako, 943 77 91 29 telefonora deituz edo euskara@bergara.eus helbidera idatziz.
