Arrizuriaga jauregiaren eraikina egonkortzea eta emango zaion erabilera zehaztea jasotzen da Bergara izan, bizi, ekin planean. Eraikinak "kultur erabilera" izatea nahiko luke Udal Gobernuak. Halaber, emakumeentzako gunea ere izango da jauregia, eta azaldu dutenez, herriko emakume eta emakume taldeekin batera adostuko dira espazio horren helburuak, zereginak, dinamikak...
Bilera irekiak
Irailaren bigarren hamabostaldian Arrizuriagaren kudeaketa eredua eta espazioaren erabilera aztertuko dituzte. Horretarako bilera irekiak egingo dira.
Atzo, uztailak 12, prozesua hasi aurreko bilera bat egin zen kultura eragileekin. Bertan egindako ekarpenak eta zalantzak jaso zituzten udal ordezkariek, eta iraileko bileran landuko dira. Jauregira bisita ere egin zuten bileran parte hartu zutenek.
Lanak aurrera doaz
Maiatzean hasi ziren eraikina egonkortzeko lanak, eta bost hilabetetan amaitzea aurreikusten dute. Eusko Jaurlaritzaren ondare izendapena dauka jauregiak, eta honenbestez, baldintza batzuk bete behar ditu eraberritzeak, hala nola, kanpoko itxura mantentzea. Egonkortze lana Goitu Eraikuntzak SL enpresa egiten ari da, 547.964 eurotan (BEZ barne) esleitutako aurrekontuarekin.