Pentekoste Jaietako asteleheneko –ekainak 6, aurten– herri bazkaria aurkeztu zutenean, Paellas Arraun Euskadik egindako haragidun paella erraldoia aurreikusi zuten antolatzaileek menuko plater nagusi gisa. Bergarako Mujika eta Larrañaga gozotegiak ziren postrea jartzeko arduradunak, eta Sirimiri jatetxea zen kafea zerbitzatzekoa.
Bada, azken bi eskaintzak aldatuko ez diren arren, Bergarako Udalak ohar bidez jakinarazi du menu beganoa ere egongo dela hala nahi duten herritarrentzat. Jatordu hau nahi duenak ezinbestean antolakuntzari jakinarazi beharko dio. Bi kanal jarri dituzte horretarako: kultura@bergara.eus helbide elektronikoa edo 943 77 91 59 telefonoa. Alergiaren bat duenak, aldiz, nahitaez deitu beharko du aurrez aipatutako telefonora.
Lekua, zehazteke
Salgai jarri dituzten 460 txartelak eskuragai daude jada seminarixoa.eus atarian edo Seminarixoko leihatilan; maiatzaren 30era arte edo guztiak agortu arte dago txartelak eskuratzeko aukera. Eguraldi iragarpena ona bada, baina, Seminarixoko karpatik San Martin plazara lekualdatuko dute bazkaria; ondorioz, beste 240 leku egongo dira bazkaltzeko.
