Aranzadi Zientzia Elkarteak Oroimena eta Giza eskubideak Bergaran proiektua garatuko du Bergaran, 36ko gerrako, diktadura frankistako eta azken hamarkadetako giza eskubideen urraketen memoria berreskuratzeko eta aldi horretan urratu diren giza eskubideak ezagutzera emateko. Lan horretarako gune garrantzitsu bat izango da Oroimenaren Bulegoa, udal artxiboan kokatuta dagoena eta eguaztenean, apirilak 27, ireki zutena. Bulegoan herritarren testigantzak eta dokumentazioa jasoko dira –unean bertan digitalizatzen dute eta jabeak unean eroan dezake bueltan–, eta herritarrek informazioa eskatzeko aukera ere izango dute.
Telefonoz eta postaz ere bai Oroimenaren Bulegoa maiatzeko eguazten guztietan egongo da zabalik, 10:00etatik 14:00etara eta 16:30etik 18:30era; Aranzadi elkarteko ikertzaile bat egongo da bertan, halako lanetan esperientzia duena. Aranzadik dei egin die herritarrei proiektuan lagun dezaten: "Herritarren testigantzak garrantzitsuak izango dira, gertatutakoaren zati bat ez baitago artxiboetan jasota".
