Birgaitzen Bolu proiektuak banakako etxeetan isolamendua jartzeko sistema sustatzen du, prozesuan parte hartzeko bi ezaugarri jarrita: ekimena taldean egitea eta ikasitakoa taldean partekatzea. Hain zuzen ere, azken fase hori garatzen izan ziren proiektuan parte hartu zuten auzotarrak joan den egubakoitzean: prozesua 2021eko otsailean jarri zen martxan eta Boluko zortzi etxebizitzak hartu dute parte.
Beroago eta zaratak murriztuz
Orokorrean, esperientzia "oso ondo" baloratu dute parte hartzaileek: "Isolamendua egin dutenetik etxea epelago dago, eta tenperatura hobeto mantentzen da iparraldeko logeletan. Bi gradu inguruko igoera nabaritu dute". Ondorioz, berogailua gutxiago jartzen dutela adierazi zuten parte hartzaileek, eta, zaratari dagokionez, errepidera ematen duten geletan zarataren "murrizketa handia" nabaritu dute.
Alderdi ekonomikoa
Erosketa kolektiboaren bidez 200 eta 300 euro bitarteko aurrezpena jaso dute parte-hartzaileek, eta ordaindutakoaren%18 jasoko dute errenta aitorpenaren bidez. Hala ere, 2022ko negua 2021ko baino hotzagoa izan dela adierazi dute, eta, hortaz, kontsumoen konparaketak ez duela informazio deigarririk eman. Etorkizunera begira, zerrenda berri bat sortu eta izena eman nahi dutenek Boluko Imaz Harategira joan beharko dute. Prozesuan parte hartzeko hamar pertsonak eman behar dute izena, eta taldeko ordezkari bat aukeratu.
