Bergarako pirolisi instalakuntza zabaltzeko asmoa bertan behera uzteko eskatu du ELAk

Bergarako Larramendiko industriagunea.

Bergaran egin gura den paper hondakinak kudeatzeko pirolisi instalakuntza "ezkutuko erraustegi" bat dela uste du ELAk. Herritarrek azaldu duten "kezkarekin eta kontrako jarrerarekin" bat egiten duela adierazi du, mobilizazioetan parte hartzeko gertu azalduz. Eta eskatu du ekonomia zirkularrean oinarritutako industria politika ezartzea.

Prentsa-ohar bidez helarazi du ELAk "ezkutuko erraustegi bat" izango dela Bergarakoa, paper fabriketako hondakinak birziklatu edo beste modu batera tratatu beharrean erre egingo dituztelako: "Urtean 155.000 tona erre ahal izango dira eta Zubietako erraustegiak 200.000 tona erretzeko gaitasuna du".

Gaur egungo "krisi klimatiko eta ekologikoaren aurrean" halako instalazioek ez dutela lekurik uste dute: "Alternatiba hondakinak gutxitzean datza: ekoizpenean neurriak hartu behar dira horrenbeste hondakin ez sortzeko". Horregatik, ekonomia zirkularra bultzatzean oinarritu beharko litzatekeela industria-politika adierazi du sindikatuak, eta onartezina dela bakarrik bultzatzea internazionalizazioa eta fiskaltasuna jaistea: "Zaldibarko zabortegia behera etorri ondoren hondakin industrialentzat eman den lehen aukera erraustegi bat izatea larria da; Europako ingurumen eta hondakin politiken guztiz aurka doa". Eta gaineratu dute Arantza Tapia COP26 goi bileran izan dela Glasgow-n klima aldaketaren aurkako jarrera erakusten eta hemen larrialdi klimatikoa areagotuko duen instalazio bat bultzatzen dabilela.

Proiektuaren berri komunikabide bidez jaso izana ere salatu du ELAk: "Beti bezala, Eusko Jaurlaritza ezkutuan jokatzen du informazioa ematerakoan, eta medioak erabiltzen ditu propaganda egiteko".

Ingurumenarentzat zein osasunarentzat kaltegarriak direla erraustegiak gaineratu dute: "Baita Bergaran iragarritako pirolisi instalazioa ere". Horregatik, herritarrek azaldu duten "kezkarekin eta kontrako jarrerarekin" bat egin dute, eta instalazioa geldiarazteko mobilizazioetan parte hartuko dutela iragarri.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.