Herritarrek egindako eskaerei jaramon eginez, olio kutsakorra jasotzeko zerbitzua hobetzeko erabakia hartu du Debagoieneko Mankomunitateak. Duela bi urte hasitako prozesua egikaritzen ari dira azken asteetan Bergaran, eta sortutako koipe likidoa modu egoki eta arduratsuan jasotzeko helburuekin, bi aldaketa nagusi izango dira: puntu kopuruetan eta bilketa moduan, hain zuzen.
Puntu kopuruak, 7tik 17ra
Egun 7 edukiontzi daude Bergaran etxean erabilitako olioa jasotzeko, eta Mankomunitateak hartutako erabakiaren ondotik, 17 egongo dira epe laburrean; olio kutsakorra jasotzeko 10 bilketa puntu gehiago, alegia. Hurrenkera alfabetikoan, ondokoak dira epe laburrean edukiontziak kokatuta egongo diren kale eta auzoak:
> Angiozar auzoa
> Arruriaga 12 (Burdiñate)
> Bidekurutzeta 46 (Erregetxo)
> Bolu 28
> Fraiskozuri 5
> Ibargarai 28
> Ibarra 13
> Komenio 2
> Kruz Gallastegi-Bideberri
> Lizaria 23 (Nafer)
> Matxiategi 12
> Mintegi 3
> Osintxu auzoa
> Oxirondo 3 (azoka)
> San Antonio 5
> Zubiaurre 33
> Zubieta 30
Botatzeko ontziak, aukeran
Bigarren berritasun nagusiak, aldiz, edukiontziekin eta bilketa ontziekin du zerikusia. Izan ere, gaur arte aurrez jasotako pote berdeetan bildu behar zen olio kutsakorra, edukiontzi berdera bota eta bueltan beste ontzi bat jaso aurretik.
Bada, edukiontzi laranjak izango dira aurrerantzean olioa biltzeko tokiak, eta kolore aldaketaz harago, herritarrek nahi duten ontzian utzi ahal izango dute koipe likidoa; ondorioz, ez dute bueltan beste ontzirik jasoko. Horrez gain, Mankomunitateak olioa botatzeko erabiltzen diren etxeko ontziak birziklatzeko konpromisoa hartu du.