Gure Eskuk antolatuta, Bergarako Udalaren babesarekin eta herriko hainbat eragileren parte-hartzearekin, Bartzelonako probintziako Manlleu herriko 40 lagun inguru etorri dira asteburuko topaketan parte hartzera. Gaur arratsaldean egin diete bergararrek harrera, eta manifestazioa egin dute jarraian, presoen askatasuna eskatuz.
Bi ilaratan banatuta zeharkatu dituzte Bergarako kaleak, batean estelada eta bestean ikurrina buruan, eta presoen aldeko ikurrekin. Askatasun Martxa amaitzeko hitzartzeak izan dira. Gure Arteraren izenean Pili Gartziak egin du berba: euskal presoen gerturatzeei eta asteon politikari kataluniarrek jasotako indultuei balioa eman arren, amnistia eta euskal presoentzat beste espetxe politika bat aldarrikatu ditu, gaitz larriak dituztenak eta 70 urtetik gorakoak etxeratzea, espainiar Estatutik kanpo betetako zigor urteak aintzat hartzea eta gradu progresiorako aukera: "Euren espetxe legedia betetzea, azken finean".
Kataluniarren izenean, berriz, Arran gazte mugimenduko Eduard Castellsek hitz egin du. Azken urteetan Kataluniako askotariko mugimenduetako militanteak errepresio eta jazarpen bortitza jasaten ari direla salatu du, Espainiaren partetik, baina ERC eta Junts ere kritikatu ditu, hainbat militanteren kontra egiteagatik.
Indultuen gainean adierazi du jendearen desmobilizazioa bilatzen duten truke txanpona direla, baina ez dutela lortuko; Kataluniarako irtenbidea independentzia dela adierazi du Castellsek.
Ekitaldia amaitzeko Agure zaharra (L'estaca) abestia abestu dute elkarrekin, batzuek euskaraz eta besteek katalanez. Bihar izango da asteburuko egun nagusia, egitarau bete-betearekin.