Gipuzkoako Foru Aldundiak baimendutako kanpaina izan da, Bergarako Udalak sustatutakoa eta Gipuzkoako erlezainen elkartearekin elkarlanean egin dena. Esperientzia pilotua izan da; 50 tranpa jarri zituzten herrian zehar banatuta, "kopuru nahikoa handia" beste kasu batzuekin alderatuta, Olabarriaren ustez. Eta ondoren, astero egin dute tranpa horien jarraipena.
Erlezainak adierazi duenez azaldu duenez, ez zuten uste datu hauek jasoko zirenik hilabete bakarrean. Horretan "lagungarri" izan da Bergarako Udalak leku asko identifikatuta izatea aurretik, udaltzainek egindako lanari esker. Izan ere, liztor beltzek urtez urte kokaleku berberak erabiltzen dituzte apiak kokatzeko. Aurretik identifikatu gabeko fokuetan ere egin dituzte frogak baina emaitzak okerragoak izan direla adierazi dute Udaletik.
Erleetan izan duen eragin positiboa, erasoa saihestu delako, hemendik hilabete batzuetara ikusiko dela gaineratu dute; Olabariaren ustez, emaitza oso ona izango da "jaso den kopurua kontuan hartuta".
Elorregin 136 erregina
Erabili diren tranpak komertzialak izan dira, pertsonentzat "kalterik eragiten ez dutenak", eta zuhaitzetan jartzen dira normalean. Liztor beltza erakartzen duen –baina erlea ez– sustantzia bat botatzen dute ontzira eta behin likidoak erakarrita bertan itotzen dira.
Tranpak herrigunean zein auzoetan jarri dituzte. Elorregi auzoan, adibidez, puntu bero bat dagoela jakinarazi dute eta 136 erregina jausi direla bertan. San
Pedroko elizako aterpean, ostera, bat edo bi bakarrik.