Hitanoa, geroago eta hedatuago Bergarako Udaleko langile batzuen artean

Jokin Bereziartua Lizarazu 2021ko ots. 10a, 15:18
Hikaldiaren barruan Irizar jauregian egindako Hikadromoan parte hartu zuten herritarrak, 2020ko azaroaren 28an.

2020ko Euskaraldiaren barruan Bergaran eta Oiartzunen esperientzia pilotu moduan abiatu zen Hikaldia izeneko ekimenari jarraipena ematen ari zaio Bergarako Udaleko langile talde bat; dagoeneko 27 langilek eman dute izena hitanoa praktikatzeko taldean. "Talde naturala izateak lagundu egiten du konfiantza giroa sortzen eta hortaz, errazagoa da askatzea", adierazi dute, besteak beste.

Udaletik azaldu dutenez, Euskara Zerbitzutik harago doa ekimena eta jatorria du 2020ko Euskaraldiaren baitan Udaleko langile batzuk euren buruari egindako galderan: "Egunero egiten dugunaz harago, zer gehiago egin dezakegu?". Oraindik zer egina bazegoela ondorioztatuz, hitanoari eutsi zioten.

Egoera bitxiak eta berriak bizitzen ari direla aitortzen dute parte hartzaileek; Ahobizi rola izatetik, une honetan, hitanoa praktikatzeko orduan Belarriprest izatera pasa dira batzuk. Bestela Belarriprest diren pertsona horiek ulertzeko eta enpatia handitzeko baliagarria izaten ari da ekimen hau. 

Hitanoa berreskuratzea, azken helburu

Ekimen honen bitartez, hika jarduteko ohitura berreskuratzen lagundu nahi da. Nahi horri erantzunez, langileetako batzuk parte hartu izan dute euskaltegian eskaintzen diren ikastaroetan eta hori praktikan jartzeko modua da udaletxean bertan hitanoa praktikatzeko konpromisoa hartu izana. Laguntzarako hainbat material erabiltzen dituzte, gaitasun gutxiagoa duenak ere baliabideak eskura izan ditzan. 

Herrian ere Hikalagun taldeak sortzeko ekimena abiatu da, beraz, non eta zeinekin praktikatu egongo da aurrerantzean. 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak