Egoitza Bergaran duen Soralucek Quality Innovation Award saria jaso du

Soraluce DWS (Dynamic Workpiece Stabiliser) izeneko sistema garatu dute, pieza malguak mekanizatzean sortzen den chatterra ezabatzeko. EAEko enpresa handien kategorian jaso dute saria.

Bergaran dagoen Soraluce enpresak chatterra –mekanizazio malguko prozesuetan sortutako bibrazioa– kentzera bideratutako moteltze aktiboko gailua aurkeztu du, eta mundu mailako Quality Innovation of the Year sarietako bat jaso du. Azaldu dutenez, kontrolagailu batek eta mekanizatu beharreko piezaren gainean jartzen diren eragingailu inertzial batzuek osatzen dute sistema.

Epaimahaiak adierazi duenez, Soralucek aurkeztutako berrikuntzak aldeko puntuazioa izan du ebaluatzen diren bost parametroetan: berritasuna, erabilgarritasuna, ikaskuntza, bezeroarenganako orientazioa eta eraginkortasuna. Soraluceko Rafael Idigoras zuzendariak azaldu du pozik daudela eta sariak haien lana aitortu duela: "Sari honek bikaintasunaren eta garapen teknologikoaren alde egin dugun apustua aitortzen du, eta Soraluceren ospea sendotzen du".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.