San Antonioko, San Martzialgo eta Antzuolako DH sariak bertan behera laga ditu Lokatzak

San Martzialgo igoerako irteera puntua, iaz.

Maiatzaren 27an eman zuen aditzera erabakia Bergarako Lokatza Ziklismo Eskolak. Hiru lasterketa suspenditzea erabaki dute COVID-19ak eraginda: ekainaren 13ko San Antonio lasterketa, ekainaren 26ko San Martzialgo igoera eta uztailaren 11ko Antzuolako Downhill lasterketa.

Lokatza Ziklismo Eskolarendako garrantzitsuak diren hiru proba suspenditu ditu COVID-19ak. Lokatzako presidente Ion Unamunok sinatutako gutun baten jakinarazi dute aipatu hiru lasterketak ez direla egingo aurten. Batetik, ekainaren 13ko kadete mailako San Antonio lasterketa, aurten 84. aldia bizi behar zuena.

Bestalde, 2017an lehenengoz antolatu zuten eta urtez urte indarra hartzen den San Martzialgo igoera ere ez da egingo. Aurtengo data ekainaren 26a zen eta bertan kadete, junior, 23 urtetik azpikoak eta elite mailako emakumeak lehiatu behar ziren San Martzialerako aldapa gogorretan, erlojuaren kontra.

Eta, azkenik, uztailaren 11n Antzuolan egin behar zen DH (Downhill) proba ere suspenditzea erabaki du Lokatzak.

"Erabakia ulertuko duzuela espero dugu", adierazi dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.