Bi hilabete konfinamenduan eman ondoren, leiho eta balkoietan mobilizazioak alde batera utzi eta astelehenean itzuli ziren Gipuzkoako Pentsiodunen Mugimenduko kideak kaleetara. Haien "haserrea" erakusteko asmoz, pandemiak adineko pertsonengan eta pentsiodunengan eragin dituen ondorioak salatu zituzten eta era berean, gogorarazi nahi izan zuten Gipuzkoako adinekoen etxeetan, apiril amaierara arte 160 pertsona hil direla, horietako gehienak "bakardade osoan" eta "hurbilekoen azken agurraren kontsolamendurik gabe".
"Iragarritako egoera"
Elkartasuna adierazteaz gain, gertatutakoa "iragarritako drama baten kronika" dela salatu dute: "Pentsiodunok urteak daramatzagu salatzen mendekotasunaren arretarako sisteman izandako murrizketak. Zerbitzu Publiko bat pribatizatzeko joera inposatu digute; eskubide unibertsal eta subjektiboa izan behar zuena ukatuz. Mendekotasuna duten adinekoei etxean ematen zaien arreta eta adinekoen egoitzetan bizi direnek jasotzen duten zerbitzua jada eskasak ziren pandemiaren aurretik, eta pandemiak bere gordintasun osoa azaleratu du".
Osasun langileekin elkartasuna
Osasun arloko langileentzat lan-baldintza egokiak eskatu dituzte, "beren lana duintasunez eta profesionaltasunez egin ahal izan dezaten". Egoera hori ere pribatizazio-politiken eta azken urteetan izan den lanpostu- murrizketen ondorioa dela azaldu dute: "Ezin dugu onartu, gure behar eta eskubideekin negozioa egiten jarraitzea. Erantzunen zain jarraitzen dugu eta kalean jarraituko dugu, Pentsio Publiko duinen Sistema Publikoa, Zerbitzu Publiko Unibertsalak eta mendekotasunaren arretarako zerbitzu soziosanitarioen sare publiko eta unibertsala defendatzen".