Koronabirusak Senegalen izan dezakeen eraginaren ondorioak apaltzea izan da helburu nagusia; izan ere, Dionewar irlako ekonomiaren oinarria arrantza da, eta egun bizi dugun osasun larrialdiaren ondorioz mugatuta dute arrantza egitea.
3 tona arroz eta 500 litro olio
Astebete honetan 1.500 bat euro batu dituzte eta horri gehitu behar zaizkio elkarteak jarriko dituen 300 euroak. "Oso pozik gaude. Dirua bideratuko dugu Dionewarren dagoen emakumeen kooperatibara. Eurak arduratuko dira jakiak erosteaz: 3 tona arroz eta 500 litro olio erosiko dituzte, herriko familia guztiei banatzeko", azaldu du elkarteko kide Nora Pedrejonek.
Dionewarren ez dago koronabirus kasurik
Dionewar 5.000 bat biztanleko herria da. "Gaur egun ez dago koronabirus kasurik, baina Senegalen 1.500 bat kutsatu daude", dio Mamadu Sarrek.
Proiektuak, airean
Elkarteko kide Eli Dominguezek nabarmendu du herrialdeko mugak itxita daudela eta ondorioz bertan behera utzi behar izan dutela orain egitekoak ziren proiektu bat: "Kultur areto bat eraiki nahi dugu; eta, hain justu, arkitektoa han zegoen mugak itxi zituztenean. Itzuli egin behar izan da. Helburua da eraikuntza teknika jasangarriak erabiltzea eraikina jasotzeko; eta, horretarako, hango gazteak trebatu gura ditugu".
Iaz egin zuten moduan, aurten ere uda partean Senegalera joateko asmoa dute hainbat bergararrek. Joaterik izango duten edo ez, oraindik ez dakite.