Bergara Kirol Elkarteko zuzendaritzak 2020ko Mahonero Eguna eta Udako Futbol Campusa bertan behera lagatzea erabaki du. Asteartean, hilak 28, hartu zuen erabakia Bergara Kirol Elkarteko futbol saileko zuzendaritzak, lehen aldiz telematikoki egin zuten bileran. Koronabirusaren krisiak eraginda, segurtasuna bermatu eta ekitaldiak ohiko moduan ospatu ezinagatik hartu dute erabakia.
Aurten ekainaren 19an eta 20an ospatzekoa zen Mahonero Egunak bosgarren aldia izango zuen. Egunaren helburua "klubeko jokalari, entrenatzaile, familia eta zaleekin batera jai giroan ospatzea" da, eta horien baitan egiten diren bazkaria eta osteko ekitaldiak jendetsua izaten dira.
Udako campusari dagokionez, ekaineko azken astean eta uztaileko lehen astean egitea aurreikusten zuten elkartetik. Aurtengoa bere hirugarren aldia izango zen; 2005 eta 2012. urteen artean jaiotako neska-mutikoek hartu ahalko zuten parte.
