Xabalote gaztelekua ere egokitu da koronabirusak eragindako aldaketara. "Hezitzaile birtualaren" figura sortuta, eguneroko plangintza martxan dute eta etengabeko kontaktuan daude bertako erabiltzaileekin modu birtualean.
Askotariko ekintzak gaztelekuan
Joan den astean hamabost galderez osatutako lehiaketa jarri zuten martxan, eta 100 gaztetxo inguruk hartu zuten parte. Era berean, gazteak gonbidatu zituzten hainbat erronka egitera: euren trebetasunak erakusteko bideoak egitera, Nahiago dut jokoan parte hartzera, Euskal taldeen jokora, Komuneko paperarekin tokeak ematera, Gipuzkoako herrien asmakizunera, Bergarako txokoak asmatzera, euskal kantuak identifikatzera… "Parte-hartzea oso ona izan da, eta erronken bi irabazleek bozgorailu bana jaso dute", adierazi dute Udaletik.
Ludotekak ere martxan
Oxirondoko, Osintxuko eta Angiozarko ludotekek "zerbitzu birtuala" ere eskaintzen jarraitzen dute: "Helburua da konfinamendua errazagoa egitea eta euskarazko aisialdia sustatzea. Hala, egunero txikienei eta horien familiei ekintzen proposamenak egiten dizkiete. Hala nola, etxeetan egiteko moduko aisialdirako ekintzak: sukaldaritzakoak, probak, esperimentuak, lehiaketak...".