Egitaraua egunez egun
Martxoaren 4an, eguaztenean, De ser mujer con discapacidad a ejercer de mujer izenburupeko hitzaldia izango da UNEDeko aretoan, 12:00etan, Goienetxe Fundazioaren eskutik. Bertan, kapazitismoaren arazoari buruz hitz egingo da, besteak beste. Hurrengo egunean, martxoaren 5ean, murala itsatsiko da Azokan, 18:00etan. Horretarako Irizar jauregiaren aurrean egingo dute hitzordua, Azokara joateko.
Bergarako ikastetxe guztietako ikasleek Kantu Kolore taldearen Nire gorputza da kantuaren koreografia egingo dute martxoaren 6an, egubakoitzean, 11:00etan, San Martin plazan eta Muniben. Txikienek, ikastetxeetan egingo dute erakustaldia. Egun berean, baina 18:00etan eta Aroztegin, herriko Emakume Artistek Amalurra erakusketa irekiko dute. Irekieraren ostean, 19:30ean, luntxa egongo da.
Martxoaren 7an, zapatuan, Shotokan K.E.ren eskutik, emakumeentzako autobabes ikastaroa egingo da Agorrosinen, 10:00etatik 12:30era bitartean. Arratsaldean, Amak eta Ain_1 taldeek kontzertua eskainiko dute Seminarixoan, 19:00etan. Martxoaren 8an, domekan, Bergarako mugimendu feministak, hainbat ekintza antolatu ditu.
Martxoaren 9an, astelehenean, Duintasuna taldeak elkarretaratzea egingo du San Martin plazan, 12:00etan. Martxoaren 11an, eguaztenean, Zinegoak film laburraren emanaldia egingo da Seminarixoan, 20:00etatik aurrera. Eta martxoaren 14an, zapatuan, Yo nunca izeneko antzezlana ikusteko aukera egongo da, Seminarixoan, 19:00etan.
Azkenik, martxoaren 23an, astelehenean, Bergaran egindako Lanbideetako genero moldeak apurtzen diagnostikoaren aurkezpena eta mahaingurua egingo dira Irizar jauregian 18:00etan.
Komertzioetako erakusleihoak
Bergarako komertzioek gainera, martxoaren 8aren bueltan apainduko dituzte erakusleihoak.
