EAJk urriaren 21eko osoko bilkuran defendatuko dituzten proposamenak hiru zutabe nagusitan oinarritu ditu: "Pentsio baxuak dituzten 65 urtetik gorako herritarrak eta gazteak; gure ustez garrantzi berezia duen herriko jarduera ekonomikoa –enpresa, komertzio, ostalaritza eta landa eremua–; eta gure lurraldea eta herriak zaintzeko neurriak uztartu nahia".
Hainbat eta hainbat neurri proposatu ditu EAJk 2020rako ordenantza fiskaletarako. Besteak beste, honako hauek:
-65 urtetik gorako bergararrei zuzenduta, Ondasun Higiezinen Gaineko Zergan –IBI moduan ezaguna– %50eko hobari berri bat sortzea, hiru baldintza hauek betetzen dituztenekin: ondasunaren jabea 65 urtetik gorakoa izatea, familia unitatearen diru-sarrerak 15.000 euro azpitik izatea, eta zerga familiaren ohiko etxebizitzaren gainekoa izatea.
-Jarduera ekonomikoaren gaineko zergan –IAE moduan ezaguna– 2018ko urritik 2019ko urrira arteko KPIren arabera igotzea zergaren tipo orokorra –KPI hori negatiboa balitz ez litzateke tiporik aldatuko, iazkoa mantenduz–; gaineratu dute ez dutela nahi %2,2ko tipora igo KPIren igoera hori ez baldin bada.
-Baserritarrei zuzenduta, beste hobari txiki bat ere proposatzen du EAJ: "Kasu honetan, animalia basatiek sortutako kalteak –bereziki basurdeek eta orkatzek eragindakoak– neurri batean erreparatzeko asmoz. Horretarako, kalteak jaso dituzten hiritarezineko lur-sailei dagokien zergaren %100a itzultzea proposatzen dugu".
Beste hainbat neurri eta hobari ere proposatzen ditu alderdi jeltzaleak, betiere helburu batekin: "Emendakin guzti honekin ordenantzetan jasangarritasuna hobetu nahi genuen, horregatik zaindu nahi izan dugu gizartea, aktibitatea eta lurraldea".
