115 tronboi jole elkartuko dira zapatuan herriko kaleetan, Tronboneitor tronboi topaketaren aitzakiarekin, hain zuen. Gipuzkoako eta Arabako 14 musika eskolako ikasleak izango dira Bergaran. Tronboi joleen 10. topaketa izango da aurtengoa. 12:00etan kalejira egingo dute herriko kaleetan: Meredith Wilsonen 76 trombones obra joko dute kalejiran. Ondoren, San Martin plazan eskainiko dute kontzertua.
Kontzertua, lau taldetan
Bailara mailan, bi herrik parte hartuko dute: Aretxabaletako Musika Eskolak, eta Bergarakoak. "Bergarako Musika Eskolako bederatzi ikasle izango dira topaketan, Alberto Laskurain irakaslearekin", azaldu du Marije Ugaldek. Biharko jardunaldian adin guztietako musikariek parte hartuko dute; bada, kontzertuari begira, adin tarteka banatu dituzte taldeak. Lau talde izango dira: 8 eta 11 urte bitartekoak, 12 eta 15 urte bitartekoak, 16 eta 18 urte bitartekoak eta 18 urtetik gorakoak. Talde bakoitzak hiru obra joko ditu eta amaieran guztiek batera Migel Gonzalez Bastidaren Hor konpon obra eskainiko dute –Alberto Laskurainek tronboiendako egindako moldaketekin–. "Obra oso ezaguna" da Bergaran.
"Pisua arintzea", helburu
"Topaketaren helburua da instrumentu horri bultzada ematea, izan ere, instrumentu minoritarioa da, baina era berean taldeetan behar den instrumentua", dio Ugaldek. "Instrumentu grabea da, eta horrelako instrumentuekin gertatzen dena da gaztetxoak ez direla animatzen, kosta egiten da", gaineratu du Ugaldek. Gaztetxoei gehiago gustatzen zaie "protagonista diren instrumentuak", adibidez tronpeta edo biolina.
Bestalde, azken urteetan tronboiak berak aldaketak izan dituela dio: "Lehen pisu handikoak ziren, eta hori oztopoa izaten zen gaztetxoendako; orain, aldiz, plastikozkoak egiten dituzte, koloretakoak direnak... izugarriak dira!".
Musika eta zientzia
Bergarak musikarekin eta zientziarekin duen lotura nabarmendu nahi izan dute antolatzaileek. Hori horrela, zientziaren arloan wolframak eta Bergarak duten lotura gogora ekartzeko, jaialdia iragartzeko kartelean keinu txiki bat egin dute: Tronwoneitor idatziz: "Beste herri batzuetatik etorriko da jendea zapatuan, eta erakutsi nahi diegu Bergarak zientzia arloan izan duen garrantzia", dio Ugaldek.
