Bertsolari bakoitzak bere estiloa izaten du, eta, hain zuzen, estilo horiek zelakoak diren azaldu du Txinbo-k: "Jon Altunak bertsokera alaia du, umore ukituaz kantatzen du; Unai Arantzabal zaletasun handiko bertsolaria da; Eñaut Uriartek betidanik kantatu izan du; eta esango nuke Enaitz Alustiza txapelketa irabazteko faboritoetako bat dela". Gaurkoa lehenengo finalerdia izango da eta hurrengoa abenduaren 14an jokatuko dute, Bule tabernan, 22:30ean. Beste lau bertsolarik parte hartuko dute bigarren saioan: Gari Lopez de Muniain, Asier Kortabarria, Iñigo Arcelus eta Iraitz Artola izango dira bertsolariak.
Finala, aldiz, abenduaren 28an izango da, Bergarako kartzela zaharrean. Kopla Barik bertso eskolak antolatzen du txapelketa, Jardunen eta gaztetxearen laguntzarekin.
Bertsoa kalera ateratzea
Bertso eskolak "osasun ona" duela diote: "Iraitz Artolak debuta egingo du txapelketan, beste bi mutiko gazte ere baditugu, neskak baita...". Aurtengo txapelketan epaile berriak ere izango dituzte. Antolatzaileek uste dute final handiaz gain finalerdietan ere aretoak bete egingo direla.
Txapelketaren helburua bertsoa kalera atera eta herritarrengana heltzea dela diote; horrez gain, bertsolariek eurek ere publikoaren aurrean kantatzeko aukera izatea nabarmendu dute."Eguaztenenetan elkartzen dira bertso eskolan; lagunarte ona dute eta taldea eginda dago. Baina ez dute gura giro hori bertso eskolan bakarrik geratzea; herritarrengana zabaldu gura dute", dio Txinbo-k.
Urtean zehar herrian sei bat bertso jaialdi egiten direla diote, eta saio horietan ikusten dela herrian badagoelako bertso zaletasuna
