Abenduaren 18rako erreferenduma deitu eta 140 langile ingurutik 96k parte hartu zuten: 90ek alde bozkatu zuten, bostek kontra eta batek zuri.
Zuzendaritzak urtarrilean bertan hasi gura du langileak erretiratu eta kaleratzen -33 erretiro aurreratu eta zortzi borondatezko kaleratze gauzatuko dituzte; hiru hilabetean, asko jota, bukatuta izatea da asmoa; eta prozesua behar moduan doala ziurtatzeko jarraipen batzordea osatu dute enpresako eta sindikatuetako ordezkariek. Printzipioz, bukatu dira mobilizazioak.
LAB izan da ezkorren azaldu den sindikatua; lau ordezkari ditu enpresa batzordean, beste lau ELAk eta bat CCOOk.
Etorkizunerako gakoak
Puntu honetara ailegatuta, Luis Alberto Elortza presidenteak Goienari adierazi dio Bergarako langile kopurua 108tik behera ez jaistea dela orain euren eskakizun nagusia eta zuzendaritzak bere konpromisoa azaldu duela hori horrela izan dadin. Ekoizpen kostuetan dago bigarren gakoa: altzairutegia itxi zutenetik ezin dituzte totxoak Bergaran bertan ekoiztu, kanpotik ekarri behar izaten dituzte eta horrek produktuaren garestitzea dakar. Arcelor Mittalek Olaberriako lantegian egin asmo dituen inbertsioen ondorioz, baina, handik ekarri ahal izango dituzte totxoak Bergarara eta hortik ikusten du etorkizuna Enpresa Batzordeko presidenteak.
