Biodibertsitatea nagusi Laboratorium Museoan

Barikuan emango zaio hasiera biodibertsitatearen inguruko erakusketari. Hura bisitatzeko aukera hilabete eta erdiz izango da, urriaren 20tik abenduaren 10era bitartean, hain zuzen ere. 

Bergarako Udalak urteak daramatza Errege Mintegiaren ondarea zaintzen, antolatzen eta berreskuratzen eta Laboratorium Museoaren bitartez, ikuspegi zientifiko, eta dibulgatiboarekin lotura duten hainbat erakusketa eskaini nahi ditu. Horietako lehena biodibertsitatearen inguruko erakusketa da.

Gai hau hobeto jorratzeko, Errege Mintegiaren bildumari Eusko Jaurlaritzak eta Gipuzkoako Foru Aldundiak egindako lagapenak batu dituzte; honela, erakusketa sortuz. Aipatu, erakusketa publiko orokorrera bideratuta dagoela.

Hamaika ekintza

Biodibertsitatearen gaineko erakusketa honetan espezie oso bereziak ikusteko aukera izango da. Baina, horrez gainera, gaiarekin lotura duten beste hainbat eta hainbat ekintza eskainiko dira. Batetik, tailerrak:  larunbat honetan bertan Aranzadi Zientzia Elkartekoekin batera familiei bideratutako tailerra eskainiko da; baita, marrazketa botanikoaren ingurukoa ere. Hura, Bartzelonako Carles Puige artistaren eskutik etorriko da.

Bestetik, Zetazeo eta itsas hegaztiak ikusteko irteera ere antolatu da.  Erakusketa erakutsiko duen ipuin kontalari bat ere izango da eta, horrez gainera, bisita gidatuak ere eskainiko dira. Bi motatakoak izango dira horiek:  aholkularitza zientifikoak egin duen aditu batek  gaztelaniaz; eta, bestetik, Laboratorium Museoaren arduradun den Iñaki Irizarrek euskaraz.

Erakusketa honen asmoa ekintza didaktikoa bilakatzea ere bada. Hau honela, datorren urtera begira, ikasleei ere eskaintzeko asmoa dago.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.