Kataluniako erreferendumaz gain, galderen eta eskaeren tartean Bergaran martxan diren bi etxe kaleratzeren inguruan Irabazik gobernuaren partetik informaziorik jaso ez izanak eragin zuen eztabaida gehien iraileko ohiko osoko bilkuran. Irabazik eta EH Bilduk irmoki salatu zuten Udal Gobernuak kaleratze horien gaineko informaziorik ez ematea eta gai horren inguruan luze eta zabal eztabaidatu zuten; gobernuak gaur egingo den batzordean emango dio informazioa oposizioari.
Boluko frontoiaren estalkia ere berbagai
Bergararrei zuzenean eragingo dieten gaiei dagokienez, Boluko frontoiaren estalkia ere izan zen berbagai osoko bilkuran. Zapatuan egindako kontsultan auzotarrek pilotalekua estaltzea erabaki ostean, proiektua idatzi egin beharko da. "Batzuk usteko dute proiektu guztia eginda dagoela, baina ez da horrela. Hiru alternatiba oso ezberdinekin joan ginen auzotarrengana eta eurek bat aukeratu zuten argi eta garbi eta hori da gauzatuko duguna", dio Elena Lete alkateak.
Oposizioak, berriz, prozesua kritikatu zuen berriro ere; EH Bilduko Agurne Barrusoren arabera, beste era batera egin behar ziren gauzak: "Prozesua beste era batera eramango balitz gaur egungo iritzi zabalagoa eta eraikitzaileagoa izango genuke. Hala ere, kontsulta egin da eta emaitzarekin bat egiten dugu; beraz, aurrera proiektuarekin".
Irabaziko Aiert Lizarraldek diagnosi bat eskatu zuen beste behin ere: "Ziur gaude Boluan frontoia estaltzearena baino babes handiagoa izango luketen proiektuak badaudela; diagnosi hori egin barik galdera ikurrarekin geratu gara".
Goiauzorako bide publikoa
Bestalde, gobernuak "lorpentzat" dauka Goiauzorako bide publikoa hobetzeko –obrak martxan daude dagoeneko– Santa Marina elizarekin egindako lursailaren doaneko eskualdaketa. "Jon Molina parrokoak erraztasun guztiak eman dizkigu lanekin udan hasteko, diru-laguntza bat zegoen-eta tartean. Lorpena da, auzotarrek aspalditik eskatzen zuten-eta", esan du alkateak.
Bideoakta, lehenengoz
Atzoko osoko bilkurako nobedadea izan zen Bergarako Udalak lehen aldiz jaso zuela bilkura bideoakta bidez, Goiena Komunikazio Taldearen zerbitzua kontratatu ostean. Abendura bitartean probaldian egongo da sistema eta bergararrek Udalaren webgunean kontsultatu ahalko dute.
