Frutak, barazkiak, euskal pastelak, txerrikiak, ahatekiak, talo eta odoloste postuak, erle eta ezti erakusketak... Denetik ekarri dute Oxirondon jarri den San Martin jaietako azokara. Bergararrendako hitzordu garrantzitsua izan ohi da feria eta goizean goiz motel hasi bada ere –eguraldiak ere ez zuen ordu horretan laguntzen–, poliki poliki eta goizak aurrera egin ahala, animatu da jendea baserritarren produktuak ikusi eta baita erostera ere.
Lehiaketetako irabazleak
Fruta lehiaketan lehenengo saria Urtza Sarrionaindiarendako izan da; bigarrena, Sonia Isasirendako eta hirugarrena, Maria Angeles Duñabeitiarendako.
Barazkirik onenak, Tomas Larrañagak eroan ditu. Bigarren saria, Eskubaratz Sozietate Zibilarendako izan da eta hirugarrena Ezozi Etxeberriarendako.
Azkenik, gaztarik onena, Gereñuko (Araba) Andikana Anaiek eroandakoa izan dela ebatzi du epaimahaiak. Ilarduiako (Araba) La Leze izan da bigarren sariaren irabazlea eta Zeanuriko (Bizkaia) Miñaburu hirugarrenarena.
