Obraren lehen fasea egitea onartu dute Pol-Poleko bazkideek

Julen Iriondo 2017ko ots. 1a, 13:29

Astelehenean egin zuen Pol-Polek batzar orokorra, eta bertan erabaki zuten San Pedroko lokaleko obraren lehen fasea bakarrik onartzea; lehen fasea egin bai edo ez galdetuta –fatxada, egitura eta bulegoak, 48.824,87 euroko aurrekontua–, 50 bazkidetatik bost bakarrik agertu ziren aurka.

Obra osoa egin bai edo ez galdetu zuten gero –97.706,17 euro–, eta hor emaitza bestelakoa izan zen: 23 alde eta 27 kontra. Hau horrela, Pol-Poleko presidente Bittor Alberdik atzera egin du berriz ere kargurako aurkeztuko denaren baieztapenean –asmo hori agertu zion Goienari duela bi aste–. Kontua da zuzendaritza aukeratu behar dela berriz –astelehenean ireki zen hautagaitzak aurkezteko hamabost eguneko epea–, baina lokaleko obra osoa aurrera ez badoa Alberdik bere burua hor ez duela ikusten adierazi du.