18. edizioa du honezkero San Antonioko Napar Feriak. Duda barik, derrigorrezko hitzordua auzotarrendako zein herriko jende askorendako.
Aurten, hamar ekoizlek jarriko dute postua ermita berriaren aurrealdean kokatu duten karpa gunean, eta bertan salgai izango dituzte txorizoak, pateak, turroiak eta bestelakoak.
Sukaldaritza lehiaketa
Napar Feriako egitarauaren barruan, aurten ere elkarteen arteko sukaldaritza lehiaketa egingo dute. Hain zuzen ere, patatak saiheskiekin gertatu beharko dituzte herriko sukaldariek. Zazpi elkartetako ordezkariak arituko dira txapela nork eramango lehian 10:30etik 13:00etara bitartean; honakoak izango dira: Gure Ametsa, San Migel-Pe, Umore Ona, Lasai Toki, Artatse, Zazpi eta Haizepe.
