2009 urteaz geroztik dago martxan Bergaran Auzoko egitasmoa. Jardun euskara elkarteak bultzatzen du, Udalaren laguntzarekin.
"Etorkinak eta orain arte euskara urrun izan duten horiek euskarara hurbiltzea" da Auzokoren helburua, Izaskun Labaienek azaldu duenez. Horrez gain, "integrazioa eta sozializazioa" ere bilatzen du.
Horretarako, eskolak egin beharrean, auzokideak (kanpotarrak edo euskaraz ez dakitenak) eta auzotarrak (euskaraz dakitenak) elkartu eta modu ludikoan denetariko ekintzak egiten dituzte, beti ere euskara oinarri hartuta. Hitzordu hauetan dinamizatzaile bat izaten da ekintzak bultzatu eta komunikazioa errazteko.
Labaienek nabarmendu du Auzokoko parte hartzaileek herrian antolatzen diren hainbat ekintzatan ere parte hartzeko ohitura dutela: "Bergarako jaietan, erreka garbiketan...". "Horrez gain, beraiek antolatzen dituzten ekintzetan jendea parte hartzera gonbidatzen dute".
Lau talde
Gaur egun, Bergarako Auzokon lau lagun talde daude martxan: bi misto, Udal Liburutegiko ganbaran elkartzen direnak ( biak egubakoitzetan; bata 10:30ean eta bestea 18:00etan), emakumeen talde bat (eguaztenetan 18:30ean liburutegian biltzen dena) eta Osintxuko taldea (astelehenetan, 18:30ean, Osintxuko ludotekan). Aspiazuk nabarmendu du "adin tarte eta nazionalitate desberdinetako jendea" elkartzen dela lagun talde horietan.
Herrira zabaltzeko nahia
Euskararen eta aniztasunaren astearen antolatzaileek azaldu dute ekimen berri hau antolatzeak Auzoko ezagutzera emateko helburua duela. "Euskaldunei zein euskaraz ez dakitenei zuzendutako ekintzak izango dira", dio Aspiazuk. Hala, herritar oro animatu nahi izan du antolatu dituzten ekintzetan parte hartzeko.
Egitarau osoa
AZAROAK 14, ASTELEHENA
Gipuzkoa aniztasunaren aurrean hitzaldia
Agustin Untzurruntzaga ( SOS Arrazakeria)
18:30ean Irizar jauregian
AZAROAK 15, ASTEARTEA
Compartimos tailerra
Zergatik euskara ikasi?
¿Por qué aprender euskara?
18:30ean Irizar jauregian
AZAROAK 16, ASTEAZKENA
Auzokoak dokumentalaren emanaldia eta solasaldia
19:00etan Zabalotegi aretoan
AZAROAK 17, OSTEGUNA
Munduko musika emanaldia
Irala kalean, 18:30etik aurrera
AZAROAK 18, OSTIRALA
Zatoz auzoko ezagutzera!
Udal Liburutegiko ganbaran, 18:00etan.
